шұғыл әрекетті топ

(Оперативная группа)

1) майдан өңірінде немесе жекелеген операциялық бағытта әрекет етуші майдан (армия) әскерлері бөлімінің уақытша біріктірілуі. Ш.ә.т. құрудың ерекше кең таралуы Ұлы Отан соғысының бас кезінде, Мәскеу және Сталинград түбіндегі шайқастарда болды. Ш.ә.т. құру қажеттілігі көбіне кей майданда немесе жолы қиын жергілікті жерлерде ұрыс қимылдарын жүргізген кезде туындап отырды. Ш.ә.т. құрамы шешуші тапсырманың жағдайы мен сипатына байланысты болды. Ш.ә.т. құрамына кіретін әскерлердің ұрыс қимылдарына басшылық жасау үшін қолбасшы (командир, бастық) тағайындалды. Ш.ә.т. тобының басқару ұйымы ретінде оның құрамына кіретін бірлестіктер (құрамалар) штабтарының бірі пайдаланылды.

2) әскерлер әрекетіне жетекшілік жасау үшін бірлестік (құрама) штабтарынан жіберілген байланыс құралдары бар офицерлер тобы. Оларға басты күштерден қол үзіп жекелеген тапсырманы орындаушылар жатады (қайта топтастыру, жаңа ауданда шоғырландыру, майданның алыс өңірлерінде ұрыс қимылдарын жүргізу кездерінде) Ш.ә.т. құрамы және оны жарақтандыру орындалатын тапсырманың міндет-мақсаты мен сипатына байланысты болады.